Hósdagin 14. des. var hátíðarløta á Føroyamálsdeildini í sambandi við, at Jógvan í Lon Jacobsen, professari, dr.philos., fylti 60 ár. Í tí sambandi hava starvsfelagarnir heiðrað hann við heiðursritinum Bók Jógvan.
Í 1997 varð Jógvan í Lon Jacobsen valdur í Føroysku málnevndina. Jógvan var formaður í Føroysku málnevndini í tíðarskeiðinum 1997-2004 og aftur í tíðarskeiðinum 2009-2012.
Heitið Bók Jógvan sipar til áhugan hjá Jógvani fyri okkara málsøgu og málsliga margfeldi. Orðingin Bók Jógvan fylgir mynstrinum, sum er ein av mongum háttum at lýsa ognarsamband í føroyskum, tó at tað ikki er eins vanligt og onnur mynstur.
Í heiðursritinum eru 29 javnlíkamettar greinar eftir føroysk og útlendsk vísindafólk. Greinarnar savna seg breitt um málfrøði og bókmentir og eru á føroyskum, øðrum norðurlendskum málum og enskum. Ritstjórnað hava Zakaris S. Hansen, Anfinnur Johansen, Hjalmar P. Petersen og Lena Reinert. Útgevari er forlagið Fróðskapur.
Heiðursritið er til keyps í bókabúðunum.