Útgivið tann: 20.09.2013
HB og KÍ (Marius Staksberg)
Skrivað hevur: Jógvan Andersen
Nú er føroyska fótbóltskappingin byrjað aftur av álvara, og nógv verður sum vera man røtt um føroyskan fótbólt hesa tíðina. Tvey av fremstu fótbóltsfeløgum okkara eru HB og KÍ, men tað kemur meira enn so fyri, at tey verða nevnd Hå-B og Kå-Í. Hetta er í grundini danskur framburður, tí í føroyskum hava vit vanliga ikki langt å. Hetta er sjálvsagt ein leivd úr teirri tíðini, tá ið mest sum alt, sum varð skrivað í Føroyum, varð skrivað á donskum. Eitt nú høvdu flestu av elstu ítróttafeløgum okkara, eins og feløg flest um ta tíðina, donsk nøvn, sum seinni eru føroyskað. Men hesir báðir stavir, h og k, verða framvegis mangan frambornir hå og kå sum í donskum. Nú átti tíðin eisini at verið komin, at vit føroyska hesar báðar stavir, so vit eitt nú siga Há-B og Ká-Í.